Gjatë dëshmisë së tij në Dhomat e Specializuara të Kosovës (DhSK), dëshmitari Sadik Halitjaha tha se me porosinë e Kadri Veselit, avokati Ben Emmerson e ka quajtur të shantazhuar.
“Zoti Emmerson ka bërë një digresion kundër meje, si duket me ndikimin e Kadri Veselit, se ashtu erdhi ajo asistentja me një letër, ka thënë se unë jam i shantazhuar se pasna pasur dhënë një urdhër diku se me u vra një burrë e dy gra dhe koka anku se pse unë nuk kam avokat. Kisha dashur shkurt që t’iu drejtohem kryetar i gjykatës e jo avokatit se ajo për mua ishte një thikë pas shpine, ai duhet ta sqarojë drejt dhe të jetë fer, dhe jo të japë goditje poshtë brezit. Të jetë, le ta tregojë se ku është urdhri, ku e ka parë, ku e ka ni dhe ku e ka atë kopje të urdhrit”, tha Halitjaha.
Halitjaha tha se nuk mundet askush ta shantazhojë atë dhe asnjëherë nuk ka qenë i shantazhuar, raporton “Betimi për Drejtësi”.
“Nuk duhet të më thotë i shantazhuar se kurrë në jetë nuk qenë i shantazhuar. Nuk ka forcë në këtë botë që me shantazhin, mund të më vrasin dhe të më burgosin, por të më ligin dhe me shantazhojnë, le ta harron Emmersoni dhe Kadria që e porositi me thanë ashtu”, tha Halitjaha.
Halitjaha tha se në këtë seancë gjyqësore, pa praninë e tij, është thënë se ky dëshmitar është pa relevancë.
“Mua nuk po me ngutet, nuk po me ik autobusi. Unë e di që duhet sqaruar këto gjëra mirë dhe duhet thënë e vërteta dhe nuk duhet ta prishni dinamizmin e punës që keni marrë përsipër, cka do t’iu them unë është se mua nuk po me pengojnë pyetjet…Kur me keni nxjerrë jashtë për mos me degju unë se çka po flitet këtu në sallë, është shtruar kjo çështje. Është thënë se ky dëshmitar është i parelevancë”, tha Sadik Halitjaha.
Pas insistimit të kryetarit të trupit gjykues, Charles Smith III, dëshmitari tha se kjo çështje është ngritur nga mbrojtja e Kadri Veselit përmes avokatit Ben Emmerson.
“Sepse kjo është gjykim publik dhe dëgjohet publikisht edhe jashtë kësaj gjykate. Këtë cështje e ka ngritur avokati Emmerson. Ju i keni edhe incizimet zoti kryetar, të mos bëhemi tani sikur nuk po e dini edhe ju. Mjaft jam i lënduar prej asaj se pse duhet ta thoshte edhe pse të më shpallte si jorelevant i kushtëuzuar nga gjykata dhe prokuroria unë këtu. Nëse më ka kushtëzuar dikush këtu, jeni ju këtu dhe prokurorja. Prokuroria ka reaguar dhe ka thënë për avokat e kam pyetur tri herë e nuk ka dashur”, tha Halitjaha.
Sadik Halitjaha tha se e ka incizimin e sallës ku është diskutuar kjo çështje dhe se këtë gjë ia kishte dërguar një familjar i tij, për të cilin, tha se nuk do ta tregojë identitetin e tij.
“Një familjar i jem, nuk ua tregoj se kush me ka thënë. E kam edhe incizimin. E kam incizimin e sallës dhe nuk duhet të bëhemi sikur nuk ka ndodhur kurrgjë. Për me fol me thikë prapa shpinës nuk duroj. Folim haptas nuk po fshihem prej kërkujt’, tha dëshmitari.
Lidhur me këtë, reagoi edhe avokati Ben Emmerson, i cili tha se ka mundur që të ikë ndonjë gjë gjatë përkthimit.
“Meqë kuptoj nga ajo se çfarë tha dëshmitari, është që na shpjegoi ose i është thënë nga dikush se çfarë ka ndodhur në diskutimin që nuk ka qenë i pranishëm dëshmitari. Mund të ndodhë që ka humbur edhe gjatë përkthimi”, tha Emmerson.
Ndryshe, kryetari i trupit gjykues, Smith III urdhëroi që të vazhdojë seanca dhe pastaj që të sigurohet që dëshmitari të flasë me dikë nga gjykata lidhur me këtë çështje.
“Le të vazhdojmë dhe pastaj të sigurohemi që dëshmitarit t’i jepet mundësia që të flasë me dikë nga gjykata pa praninë e palëve apo personave që janë këtu në gjykatë”, tha Smith III.
Pyetjet për dëshmitarin Sadik Halitjaha ka filluar që t’i parashtrojë mbrojtja e Veselit përmes avokatit Ben Emmerson.
Ndryshe, në seancën e së hënës kur filloi dëshminë dëshmitari Halitjaha, Emmerson ka thënë se ky dëshmitar është “bashkëkonspirues pa aktakuzë” dhe pretendohet se ai ka urdhëruar rrëmbimin e tri grave që janë familjare të dëshmitarëve, e të cilat më pas janë gjetur të vdekura.
Në parashtrimin e tij, Emmerson tha se gjatë marrjes në pyetje ky dëshmitar mund të japë informacione të cilat mund të jenë vetinkriminuese, raporton “Betimi për Drejtësi”.
“Sikurse mund të dini i nderuar gjykatës, ky dëshmitar citohet si atë në Amerikë e quani bashkëkonspirues pa aktakuzë dhe kjo shtjellohet më tej në paragrafin 155 të aktakuzës dhe shtjellohet më tej në paragrafin 329 të dosjes së gjykimit paraprak të Prokurorisë. Ajo ka të bëjë me një incidim që e keni çuar edhe më herët dhe lidhet me një pretendim që ky dëshmitar ka urdhëruar rrëmbimin e tri anëtarëve të familjeve të dëshmitarëve, tri gra të cilat janë gjetur të vdekura”, tha Emmerson.
Avokati tha se meqë dëshmia e dëshmitarit mund të jetë vetinkriminuese, mund ta lejojë të marrë një këshillë nga një avokat.
“Duke marrë parasysh këtë historik, këtë sfond dhe këtu sigurisht në… të paragrafit 97, paragrafi 5 të protokollit të urdhrit për zhvillimin e procesit gjyqësor të datës 25 janar… ku thuhet se gjatë seancës përgatitore, marrja në pyetje nga z.Pace duhet ta bëjë marrjen në pyetje duke marrë parasysh dëshmitarët dhe informacionet që ai mund të japë, mund të jetë vetinkriminues dhe që të lejojë që të marrë këshillë nga një avokat”, tha tutje Emmerson.
Emmerson tha se nuk e ka dëgjuar prokurorin James Pace që nuk e ka informuar dëshmitarin se në qoftë se trajtohet ose del ndonjë çështje e cila e inkriminon, atëherë duhet të ngrihet çështja te trupi gjykues.
Sipas tij, është e rëndësishme që t’i sqarohet dëshmitari se cilët janë hapat që mund të ndodhin, në rast se cenohen një nga pikat e lartpërmendura.
Tutje, Emmerson tha që në shënimet që i ka parë, nuk e ka të qartë nëse Prokuroria ia ka bërë me dije dëshmitarit që ai jo vetëm që mbetet në dyshim, por është një element shumë i rëndësishëm kundër të akuzuarve.
Ndërsa, prokurori James Pace tha se dëshmitarit i është bërë me dije, dhe se i njëjti ka hequr dorë nga e drejta për të pasur avokat.