Lideri i Hamasit, Ismail Haniyeh, ka deklaruar se ata janë në prag të një “marrëveshjeje të mundshme” për armëpushim me Izraelin, ndërkohë që nga ana tjetër, autoritetet izraelite ende nuk kanë bërë ndonjë koment zyrtar.
Sipas burimeve të agjencisë franceze lajmesh (AFP), një marrëveshje paraprake mund të përfshijë një armëpushim pesëditor, duke përfshirë ndalimin e luftimeve tokësore dhe kufizime në operacionet ajrore izraelite mbi Gazën jugore.
Lexo edhe: Izraeli dhe Hamasi afër marrëveshjes për lirimin e pengjeve?
Gjithashtu, grupet militante palestineze do të lironin 50-100 pengje civilë izraelitë ose nga kombësi të tjera, ndërsa në këmbim, 300 palestinezë, përfshirë gra dhe fëmijë, do të liroheshin nga burgjet izraelite.
Burimet e AFP gjithashtu raportojnë se zyrtarë anonimë nga Hamas dhe grupi i Xhihadit Islamik kanë konfirmuar pajtimin me kushtet e marrëveshjes.
Zyrtari i Hamasit, Issat el Reshiq, ka bërë të ditur se negociatat po përqendrohen në zgjatjen e armëpushimit, dërgimin e ndihmës humanitare në Gazë dhe shkëmbimin e pengjeve izraelite me të burgosurit palestinezë.
“Të dyja palët do të lironin gratë dhe fëmijët”, ka deklaruar ai.
Ai gjithashtu ka njoftuar se detajet e marrëveshjes do të shpallen nga Katari, i cili ka luajtur rolin e ndërmjetësuesit në këto bisedime.
Lufta, që tani gjendet në javën e shtatë, u nxit pas sulmeve të 7 tetorit të Hamasit në jug të Izraelit, kur sulmuesit e këtij grupi vranë afër 1.200 persona, shumica civilë dhe rrëmbyen 240 të tjerë.
Mbi 11.00 palestinezë janë vrarë gjatë luftës, dy të tretat gra dhe fëmijë, sipas autoriteteve shëndetësore palestineze.