Hamasi ka dorëzuar trupat e katër pengjeve izraelite tek Kryqi i Kuq në Gaza, në një proces të kryer me kërkesën e Izraelit pa publikime mediatike, raportojnë agjencitë AFP dhe Reuters.
Në këmbim të kësaj, pritet të lirohen mbi 600 të burgosur palestinezë, një proces që ishte paraparë për të shtunën e kaluar, por ishte pezulluar nga autoritetet izraelite.
Lirimi i të burgosurve do të ndodhë vetëm pasi ekspertiza mjeko-ligjore të konfirmojë identitetin e trupave të dorëzuar.
Ky proces mund të zgjasë disa orë, sipas burimeve izraelite.
Me përfundimin e këtij shkëmbimi, faza e parë e armëpushimit mes Izraelit dhe Hamasit do të përmbyllet.
Megjithatë, mbetet e paqartë se çfarë do të ndodhë më tej, pasi negociatat për fazën e dytë ende nuk kanë përparuar në mënyrë konkrete./BBC