Kandidati i Partisë Demokratike të Kosovës (PDK) për kryeministër, Bedri Hamza, ka reaguar pas përfundimit të numërimit të votave nga Komisioni Qendror i Zgjedhjeve (KQZ), duke thënë se procesi zgjedhor po shkon drejt fundit dhe tashmë pritet certifikimi i rezultateve përfundimtare, pasi të shqyrtohen ankesat e mundshme të partive politike.
Hamza ka bërë thirrje për krijimin e institucioneve të reja pa vonesa, duke theksuar se është përgjegjësi e partive politike të respektojnë afatet ligjore dhe të jenë transparente në këtë proces.
“Procesi zgjedhor po shkon drejt fundit dhe ditëve të ardhshme presim të certifikohen edhe rezultatet zgjedhore.
Deputetëve të zgjedhur të të gjitha subjekteve politike iu dëshiroj suksese në punën e tyre. Nga mandatet e fituara buron edhe detyra e shenjtë për t’iu shërbyer me ndershmëri dhe përgjegjësi atyre që besuan te secili i zgjedhur.
Faleminderit mbi 196 mijë qytetarëve që besuan te Partia Demokratike e Kosovës. Faleminderit për mbështetjen që na e keni dhënë për ta bërë Kosovën më të mirë!
Institucionet e reja duhet të krijohen pa vonesa dhe është përgjegjësi e jona t’i respektojmë afatet ligjore dhe të jemi transparentë.
Së bashku duhet t’i mbrojmë vlerat që na bashkojnë, interesin publik dhe vendin tonë!”, ka shkruar Hamza në Facebook.
PDK ka dalë si partia e dytë në këto zgjedhje, duke fituar 24 mandate në Kuvendin e Kosovës.