Ministri i Mbrojtjes, Ejup Maqedonci, ka njoftuar për hapjen zyrtare të konkursit për t’u bërë pjesë e Forcës së Sigurisë së Kosovës (FSK).
Maqedonci, në një postim në Facebook, ka theksuar se ushtria do të pranojë 300 të rinj.
“Të rinj e të reja të Republikës së Kosovës, të gatshëm për t’i shërbyer atdheut, ju njoftojmë se konkursi për t’u bërë pjesë të Forcës së Sigurisë së Kosovës, sot zyrtarisht është hapur. Ushtria jonë do të pranoj 300 te rinj që do të mbrojnë Republikën nën emblemën e shqiponjës sypatrembur”, ka shkruar Maqedonci.
Sipas tij, nga sot – e hënë deri më 10 tetor 2024, të gjithë të rinjtë e të rejat e interesuara për t’u bërë pjesë e ushtrisë së Kosovës, mund të aplikojnë në webfaqen e ministrisë, duke plotësuar formularin në këtë link: https://rekturimi.fsk.rks.org/apply.
“Si pjesë e Forcës së Sigurisë së Kosovës gjersa i shërbeni atdheut do të keni mundësi të zhvilloni një karrierë të sigurt të udhëhequr nga profesionistët më të mirë në fushën e mbrojtjes”, ka shkruar tutje Maqedonci në Facebook.