Kosova është ndërtuar nën hijen e mohimit të të drejtave të njeriut ka potencuar i pari i AAK-së, Raumush Haradianj, në 75 vjetorin e miratimit të Deklaratës Universale të të Drejtave të Njeriut.
Haradinaj ka thënë se duhet të kujtojmë mbështetjen e miqve të Kosovës në krye me Shtetet e Bashkuara të Amerikës që dënuar shkeljet e të drejtave ndaj popullit shqiptar.
“Sot, e gjitha bota shënon 75-vjetorin e miratimit të Deklaratës Universale të të Drejtave të Njeriut. Në vitin 1948, ky dokument monumental u miratua për të mbrojtur të drejtat dhe liritë themelore të njeriut.
Për ne si vend, kjo datë është një kujtim i rëndësishëm, pasi përjetuam cenime serioze të të drejtave tona nga sisteme autoritare dhe okupatore. Edhe sot, pas 15 vitesh nga pavarësia dhe afër 25 vjetësh prej çlirimit, jemi të përkushtuar për mbrojtjen e këtyre vlerave për të siguruar që dinjiteti i çdo qenie njerëzore është i paprekshëm. Kosova është ndërtuar nën hijen e mohimit të të drejtave të njeriut, dhe padyshim kujtojmë mbështetjen e miqve tanë në NATO në krye me ShBA që dënuan shkeljen e të drejtave ndaj popullit tonë”, ka shkruar Haradinaj në Facebook.
Më tej Haradinaj ka thënë se shteti i Kosovës duhet të vazhdojë rrugën drejt një të ardhme kur drejtësia dhe respekti ndaj të drejtave të njeriut janë të garantuara dhe të mbrojtura.
“Sot, ne, si një shtet i pavarur e demokratik, vazhdojmë rrugën tonë drejt një të ardhmeje ku drejtësia dhe respekti ndaj të drejtave të njeriut janë të garantuara dhe mbrojtura si vlera themelore, duke përfshirë këtë Deklaratë në Kushtetutën tonë”, ka përfunsuar kryetari i AAK-së.