“Ku ia ke qitë hesapin, a po don me çdo kusht me e rreziku veriun, apo je i padijshëm e s’po ka kush me të mësu! Ndalu se don me e marrë në qafë këtë vend e këtë popull!”.
Kështu i është drejtuar Kryetari i Aleancës për Ardhmërinë e Kosovës (AAK), Ramush Haradinaj Kryeministrit të Kosovës, Albin Kurti pas shpërthimit te tre rrokaqiejt në veri të Mitrovicës.
Pas paralajmërimit për mbajtjen e zgjedhjeve lokale në veri të vendit dhe tentimit të shtetit të Kosovës për organizimin e tyre, është tensionuar situata. Mediumi lokal, në Mitrovicë “Jepi zë”, e ka publikuar një video-incizim, të momentit të shpërthimit te tre rrokaqiejt në veri të Mitrovicës.
Pas kësaj, Haradinaj ka reaguar me një postim në Facebook, drejtuar kryeministrit Kurti.
“Çka po të ngutet o Albin Kurti me krejt planet, punët e veprimet që po i bën, qoftë duke provuar zgjedhje fiktive në veri, qoftë duke emëruar ministra me urgjencë, qoftë duke kundërshtuar tabela… e gjithmonë duke u tërhequr si dje e si sot e duke e nxjerrë Kosovën humbëse! Ku ia ke qitë hesapin, a po don me çdo kusht me e rreziku veriun, apo je i padijshëm e s’po ka kush me të mësu! Ndalu se don me e marrë në qafë këtë vend e këtë popull!”, ka deklaruar Haradinaj.
Komisioni Qendror i Zgjedhjeve ka thënë se janë në pritje të njoftimeve nga zyrtarët komunalë të zgjedhjeve, të cilët të martën e gjashtë dhjetorit, nën përcjelljen e Policisë së Kosovës, kanë shkuar në zyrat e tyre, në Mitrovicë të Veriut dhe në Zubin Potok, “me qëllim të ushtrimit të detyrave zyrtare, por kjo nuk ishte e mundur”.
Në këto raporte do të sqarohet situata e krijuar.
Kështu ka bërë të ditur për Portali Dukagjini, zëdhënësi i KQZ-së, Valmir Elezi.
Serbët në Veri e pengojnë KQZ-në t’i ushtrojë detyrat zyrtare
Zyra e Komisionit Qendror të Zgjedhjeve në Mitrovicën e Veriut është sulmuar nga persona të panjohur, mbrëmjen e së hënës së pesë dhjetorit.