Kryetari i AAK-së, Ramush Haradinaj, ka reaguar ashpër pas fjalimit të deputetit Armend Muja, për projektligjin për pagën minimale, ku janë përjashtuar veteranët e luftës së UÇK-së.
Haradinaj në seancën e sotme të Kuvendit ka thënë se është turp i madh, që njerëzit e zgjedhur nga populli si Muja, të arrijnë në këtë pikë që të diskutojnë, për ndryshimin e ligjit të pagës minimale.
“Është turp për krejt juve, edhe për ty Glauk Konfjuca, djali i Sherif Konjufcës, duhet me ju ardh marre që kemi ardhur deri te kjo pikë, që për 35-40 euro të tyre, të vijmë deri në këtë pikë”, ka thënë Haradinaj.
“Është marre, a jeni njerëz a çka jeni? S’keni me mujt me kalu këtë ligj, turp të keni, nuk bën me lujt, me i poshtëru veteranët”, ka vazhduar ai.
Ndërsa, kryeparlamentari Glauk Konjufca i është përgjigjur Haradinajt, duke i thënë se ky është Kuvend, “ku edhe vetë keni qenë Kryeministër”.
Haradinaj, ka replikuar duke thënë “çfarë Kuvendi është ky që i lë veteranët te dera”.
Ndërsa, edhe deputeti i LDK-së, Avdullah Hoti, ka thënë se vendimi që të shkëputet paga minimale nga paga që marrin veteranët dhe disa prej skemave tjera është puro politik.