Kryetari i Aleancës për Ardhmërinë e Kosovës, Ramush Haradinaj, ka akuzuar kryeministrin, Albin Kurti, se nuk është trimëri që të shkojë në veri të Kosovës e të thotë që situata është në rregull.
“Nuk është trimëri që me një divizion të Policisë, Kryeministri i vendit të shkojë në një pjesë të territorit të tij për një hamburger dhe të mashtrojë çdo qytetar të Kosovës se gjithçka në Veri është rregulluar. Frika dhe paranojat e tij i futi në gabime edhe ata që s’duhej të gabonin. Pra mekanizmat e sigurisë”, ka shkruar Haradinaj.
Ai kritikon Kurtin se ka frikë nga qytetarët që të dalë e të thotë se cilat janë akuzat e presidentes, Vjosa Osmani.
Teksa akuzon Kurtin që edhe hapja e urës së Ibrit “është mashtrim”.
Gjatë ditës së djeshme, kryeministri Kurti ka thënë se shtesat për lehona dhe fëmijë janë trashëgimi e qeverisjes Kurti.
Haradinaj në postimin e tij në “Facebook” thotë se “Albini bëhet pak trim dhe mashtron se ka paguar lehonat.”
“Kryeministri sado që e mban kokën lart reflekton frikë dhe frikësohet nga të gjithë. Ai frikësohet të dalë para qytetarëve dhe të tregoj çka ka të vërtetë në akuzat e Presidentes. Ai frikësohet të dalë para gazetarëve dhe të tregojë çka po ndodhë me Procesin e Berlinit dhe pse po e shtyen BE-në drejt përjashtimit të Kosovës. Ai frikësohet të dalë dhe të tregojë të vërtetën për mos-hapjen e urës dhe ende mban qytetarët në mashtrime se së shpejti do të hapet ajo. Albini bëhet pak trim dhe mashtron se ka paguar lehonat përderisa Komunat me buxhete te varfëra i paguajnë edhe më shumë edhe më dinjitetshëm“.
“Kryeministri u ikë dhe u frikësohet gazetarëve dhe ndihet trim kur i shtyen kolegët e tij të dalin dhe të flasin e mos të tregojnë asgjë për të gjitha këto tema sepse vet s’ka çka thotë. Ai sot as për Byron për Konfiskim të Pasurisë nuk foli sepse ai e din që bashkëpuntorët e vet do të jenë klientët e parë të saj e për vete është i sigurtë se shpëton. Shpëton sepse mendon se askush s’do ta ndjek në Norvegji,” ka shkruar Haradinaj.