Kryetari i Aleancës për Ardhmërinë e Kosovës, Ramush Haradinaj, ka kujtuar kolosin e lëvizjes së shqiptarëve, Adem Demaçin, me rastin e ditëlindjes së tij.
Me anë të një postimi në Facebook, Haradinaj ka thënë se Adem Demaçin nuk e thyen as vitet e shumta në burgjet serbe.
“Kujtojmë e nderojmë në ditëlindjen e tij, kolosin e lëvizjes së shqiptarëve të Kosovës për liri e pavarësi, Adem Demaçin. Atëherë kur shumëkush ishte dorëzuar, baca Adem ishte më këmbëngulës se kurrë në të drejtën tonë të mohuar. Nuk e thyen as vitet e shumta në burgjet serbe. Gjysmë jete prapa grilave, ai mbeti po i njëjti Adem; sypatrembur e i drejtpërdrejtë. Mirënjohës përgjithmonë rrugëtimit të tij jetësor në shërbim të Atdheut”, shkroi Haradinaj.
Në anën tjetër, kryeministri i Kosovës, Albin Kurti, me rastin e ditëlindjes së tyre, të dielën i ka përkujtuar Adem Demaçin dhe Astrit Deharin.
Me anë të një postimi në Facebook, Kurti ka thënë se këtë të diel i ka vizituar familjet e tyre.
Demaçin, Kurti e ka vlerësuar se e vërteta e shqiptarëve në raport me Serbinë, kurse Deharin si konfirmim i asaj të vërtete dhe drejtësi e munguar në Kosovë.
“Adem Demaçi e Astrit Dehari sot e kanë ditëlindjen. Vizituam familjet e tyre – përplot kujtime mallëngjyese e udhërrëfyese. Njëri si e vërteta e shqiptarëve në raport me Serbinë, tjetri si konfirmim i asaj të vërtete dhe drejtësi ende e munguar në Kosovë”, shkroi Kurti.
Ndryshe, Demaçi vdiq më 26 korrik të vitit 2018-të.