Kryetari i Aleancës për Ardhmërinë e Kosovës, Ramush Haradinaj, ka reagur lidhur me deklaratën e presidentes së Kosovës, Vjosa Osmani, për marrëveshjen e Serbisë dhe Rusisë për furnizim me gazin rus.
Me anë të një postimi në llogarinë e tij në Facebook, ish-kryeministri Haradinaj ka thënë se ndonëse Osmani ka reaguar për këtë ujdi të re, ajo po hesht për refuzimin e gazjellësit armerikan në Kosovë.
“Presidentja e vajton marrëveshjen Vuçiq-Putin për gazin rus e hesht JO-në e Kosovës (e thënë nga KM Kurti) për gazin amerikan?! Ec e bjeri në fije”, ka shkruar Haradinaj.
Ndërkaq, presidenti i Serbisë, Aleksandër Vuçiq, pas një bisede telefonike me homologun e tij rus, Vladimir Putin, ka thënë se Serbia do të ketë një çmim të favorshëm për gazin rus.
Ai, po ashtu, ka njoftuar për një marrëveshje që do të nënshkruhet, e cila do të jetë trevjeçare, lidhur me furnizimin e kësaj lënde.
Lidhur me këtë, të hënën e 30 majit ka reagur presidentja Osmani, e cila ka thënë se presidenti i Serbisë, Aleksandër Vuçiq, duke blerë gazin rus po e financon luftën e presidentit rus, Vladimir Putin.
Me anë të një postimi në llogarinë e saj në Twitter, Osmani ka theksuar se vendimi i qëllimshëm i Vuçiqit për të marrë anën e Rusisë, është një goditje për perspektivat e Serbisë për të ecur në rrugën e Bashkimit Evropian.
“Ai ka zgjedhur të bashkohet me një kriminel lufte dhe të financojë luftën e Putin-it, mbi një Evropë të bashkuar, paqësore dhe të begatë. BE nuk mund të injorojë më rrugën shkatërruese që ka marrë”, ka shkruar Osmani.
Vucic's deliberate decision to side with Russia is a blow to Serbia's prospects of walking the EU path.
He has chosen to align with a war criminal & to finance Putin's war, over a united, peaceful & prosperous Europe.
🇪🇺 can no longer ignore the destructive path he has taken. pic.twitter.com/nZtoU1vpfc
— Vjosa Osmani (@VjosaOsmaniPRKS) May 30, 2022
Pos presidentes, për këtë ka reaguar edhe kryeministri i Kosovës, Albin Kurti.
“Ata as nuk duhet të takohen më, marrëveshjet mes Putinit dhe Vuçiqit tani arrihen përmes bisedave telefonike”, ka shkruar Kurti në TWitter, duke shtuar deklaratën e Vuçiqit në lidhje me Kosovën pas takimit të tij të 19-të me Putinin në Soçi, më 25 nëntor 2021.
They don’t even have to meet anymore: agreements between Putin and Vucic are now reached through phone conversations. But here’s what Vucic said regarding Kosova after his 19th meeting with Putin in Sochi on 25 November 2021: pic.twitter.com/2STJXPQUBo
— Albin Kurti (@albinkurti) May 29, 2022
Ndërkaq, çmimi i gazit që Serbia do ta blejë, aktualisht, është tri herë më i ulët sesa çmimi me të cilin e blejnë këtë lëndë shtetet e tjera evropiane.
Ndërkaq, në dimër ky çmim do të jetë dhjetë deri në 12 herë më i ulët.
Vuçiq ka theksuar se bashkë me Putinin janë pajtuar për çmimin për furnizimin e 2.2 miliardë metër kubikë gaz në vit dhe ka shtuar se Serbisë i duhen edhe 800 milionë metër kubikë për shkak të zhvillimit të industrisë.
Marrëveshja aktuale për furnizimin me gazin rus skadon më 31 maj.
Ndërkaq, ndonëse vendet perëndimore kanë vendosur sanksione të ashpra ndaj Rusisë për shkak të agresionit në Ukrainë, Serbia është i vetmi shtet në rajon që nuk u është bashkëngjitur të njëjtave vendime.