Paraditen e së premtes qëndroi në Burojë, kurse natën, Hashim Thaçi e kaloi në selinë e EULEX-it në Fushë-Kosovë.
Mëngjesin e së shtunës, ish-presidenti priti për vizitë në ambientet e misionit të BE-së për sundim të ligjit, fillimisht vëllezërit.
Kjo pasi një ditë më parë, Gjykata Speciale e lejoi ta vizitojë varrin e babait që i vdiq para 6 ditësh, dhe në vendlindje takoi nënën dhe bashkëshorten.
Vëllezërit e Thaçit qëndruan me të për më shumë se një orë, e kur dolën nga dyert e EULEX-it nuk folën shumë për takimin.
“Mirë është me shëndet. S’mundemi me fol, e kemi të kufizuar”, ka thënë Gani Thaçi – Vëllai i Hashim Thaçit.
Më gjatë se vëllezërit, me Thaçin qëndroi bashkëshortja e tij, Lumnija, cila hyri brenda me veturë.
Këto vizita u përcollën me brohoritje nga disa mbështetës të Thaçit që u mblodhën para selisë së EULEX-it në shenjë proteste.
“Skemi heronj për të sakrifikuar” dhe “Drejtësi, jo politikë” ishin pankartat disa nga pankartat që mbanin këta protestues.
Me këto thirrje edhe u përcoll.
Ish-presidenti dhe ish-kryeministri qëndroi në këto hapësira deri në ora 12:00 të së shtunës.
Përcjellja e tij për në Aeroportin e Prishtinës për të marr rrugën pastaj për në qendrën e paraburgimit në Hagë u bë nën masa të rrepta sigurie nga zyrtarë të EULEX-it dhe Policisë së Kosovës.
Pas largimit të tij nga Kosova, familja Thaçi falënderoi përmes një deklarate të gjithë qytetarët dhe institucionet që i ngushëlluan pas vdekjes së Haxhi Thaçit.
“Institucionet e Kosovës, Shqipërisë, Malit të Zi dhe përfaqësitë diplomatike të shteteve mike i falënderojmë për telegramet e tyre të ngushëllimit, ndërsa liderët politikë shqiptarë i falënderojmë për thirrjet e tyre telefonike. Mirësia juaj do të mbetet përherë me ne dhe do u jemi gjithmonë mirënjohës për mbështetjen dhe forcën që na dhatë gjatë këtyre ditëve të pikëllimit” – Familja Thaçi
Kjo është vizita e katërt e Thaçit në Kosovë që nga dërgimi i tij në paraburgim në Hagë në vitin 2020.