Në orën 00:30 gjatë mesnatës, një koktej molotovi është hedhur në një shtëpi të ndërtuar nga Qeveria e Kosovës në lagjen “Kodra e Minatorëve” në veri të Kosovës.
Sipas Policisë, zjarri është shuar dhe dëmet janë sanuar, ndërsa nuk ka pasur të lënduar, vetëm dëme materiale.
Ministri i Administrimit të Pushtetit Lokal, Elbert Krasniqi, ka dënuar sulmin dhe ka theksuar se as kërcënimet dhe shantazhet nuk do ta ndalin përpjekjen për sigurimin e banimit të qëndrueshëm.
Krasniqi ka akuzuar gjithashtu presidentin serb, Aleksandër Vuçiqin, për nxitje të mosdurimit etnik, duke theksuar se ky është rezultat i propagandës dhe i humbjes së kontrollit ndaj strukturave paralele në pjesën veriore.
“Qeveria e Republikës së Kosovës e denon fuqishëm këtë akt dhe as ky e asnjë sulm tjetër nuk e ndal kthimin e banorëve në pronat e tyre. Kërcënimet, shantazhet, pamfletat terroriste, nuk i friksojnë qytetarët dhe as nuk e ndalojnë punën tonë për sigurimin e banimit të qendrueshëm. Ky sulm është nxitje e mosdurushmërisë etnike e cila nxitet nga Vuçiçi i cili ka mbetur i mbyllur në propagandën e tij dhe e ka humbur kontrollin e strukturave paralele në pjesën veriore”, ka shkruar Krasniqi në Facebook.