Alban Zogaj ka njoftuar se ka dorëzuar dorëheqjen nga pozita e nënkryetarit të Komunës së Prishtinës pas fitores në zgjedhjet për deputet.
Në një postim në Facebook, Zogaj falënderoi ekipin me të cilin ka punuar, kryetarin Përparim Rama dhe kryetarin e partisë së LDK-së, Lumir Abdixhiku për mbështetje dhe bashkëpunim, si dhe qytetarët e Prishtinës që e kanë mbështetur gjatë kësaj periudhe.
Ai theksoi se dorëheqja e tij është një pasojë e zgjedhjes së tij si deputet në Kuvendin e Kosovës, një përgjegjësi që ai e pranon me përulësi dhe angazhim të plotë.
“Dorëheqja ime vjen si rezultat i zgjedhjes sime si Deputet në Kuvendin e Kosovës – një përgjegjësi e madhe që e pranoj me përulësi e përkushtim të plotë. Besimi i qytetarëve është shtysa ime më e madhe për të vazhduar punën në një nivel tjetër, tash për të gjithë Kosovën. Prishtina do të mbetet gjithmonë në zemrën time. Kjo nuk është një lamtumirë – është vetëm një kthesë e re në rrugën e shërbimit publik”, kështu ka njoftuar Zogaj në Facebook.