Eksperti i sigurisë, Nuredin ibishi, ka deklaruar se Milan Radojçiq i cili po kërkohet nga INTERPOL-i, vazhdon të jetë prezent rreth komunave të veriut të Kosovës.
Në një linjë direkte në emisionin “Five” në RTV Dukagjini, Ibishi ka thënë se përmes takimit të ambasadorit të Serbisë në SHBA-, Marko Gjuriq dhe Radojçiqit po konfirmohet mundësia për një luftë të vazhdueshme hibride të presidentit serb, Aleksandër Vuçiq.
“Ai është akoma në lëvizje në Rashkë dhe vendet përreth deri në Kralevë, në pjesën në kufi me katër komunat ose dy komunat në veri të Kosovës dhe ka grupe të armatosura që po i frekuenton… përmes këtij takimi vetëm se konfirmohet ndërlidhja dhe mundësia për një luftë të vazhdueshme hibride të Vuçiqit, por edhe të kryeministrit në ardhje, Gjuriqit”, tha Ibishi.
Sipas ekspertit të sigurisë, Radojçiq është akoma një prej faktorëve determinues të politikës serbe.
“Kjo tregon se politika serbe është i kriminalizuar deri në atë masë sa mori kritika gjithandej edhe nga SHBA-të… kjo tregon se deri në çfarë mase ka shkuar e gjithë kjo çështje, edhe pse ai ka thënë se është tërhequr nga Lista Serbe, nga politika, por kjo tregon se ai është akoma një prej faktorëve determinues të politikës… ata i kanë bërë një autogol vetit me gjithë këtë, duke rishfaqur lidhshmërinë me vetë aktin terrorist. Kjo rikonfirmon se kontaktet kanë qenë të rregullta në kohën e para aktit terrorist. Ata e kanë injoruar që nga fillimi fletarrestin për Radojqiqin, ata kanë thënë se do të gjykohet sipas ligjeve në Serbi, nuk do të ekstradohet, e injorojnë atë çfarë është kërkuar nga drejtësia kosovare. Në fazën vazhduese ku do të shpallen edhe 18 fletarreste do të pritet reagimi i mëtejme i faktorit ndërkombëtar”, shtoi ai.
Ndryshe, Gjuriq ka reaguar nëpërmjet rrjeteve sociale, pasi të shtunën ishte publikuar një fotografi ku shihej ai duke darkuar me ish-nënkryetarin e Listës Serbe, Milan Radoiçiq, i cili kërkohet nga Interpoli dhe është i sanksionuar nga Shtetet e Bashkuara të Amerikës.
Radoiçiq kishte pranuar se ishte prapa grupit që kreu sulm terrorist në Banjskë të Zveçanit, ku u vra rreshteri policor Afrim Bunjaku. Radoiçiq po vazhdon të endet i lirë në Serbi. Ai është vendosur në listën e të kërkuarve nga Interpoli me kërkesë të Kosovës.
Fotografia e Gjuriqit me Radoiçiqin ishte publikuar në rrjete sociale e po ashtu edhe nëpër mediume, ndërsa ka pasur reagime të shumta. Nuk është bërë e ditur se kur është shkrepur fotografia.