Njohësi i sigurisë, Nuredin Ibishi ka thënë se Serbia ka përjetuar një herë pasojat e të ndërhyrit në territorin e Republikës së Kosovës dhe si rrjedhojë, nuk beson se e njëjta do të përsërisë një veprim të tillë.
I ftuar në FIVE të RTV Dukagjini, Ibishi ka thënë se shteti serb po përdorë një luftë speciale përkrah së cilës, po ngriten tensione të aktivizimit të grupeve ilegale në Veri të Mitrovicës.
“Nuk do të hyjë në Kosovë se e di ç’ka e pret. E ka përjetuar njëherë në qershorb të vitit 1999, i di pasojat”, ka deklaruar Ibishi.
Krahas kësaj, Ibishi ka thënë se serbët në veri të vendit janë të instrumentalizuar dhe se të njëjtit, janë në presion të regjimit të Beogradit. Sipas tij, në situata të tilla do duhej të dëgjoheshin aleatët strategjikë dhe këshilolat e të njëjtëve, të merreshin parasysh.
“Serbët janë të instrumentalizuar dhe janë në presion të regjimit të Beogradit. Do të ishte mirë të merrej parasysh që të dëgjoheshin partnerët tanë strategjik”, ka deklaruar Ibishi gjersa ka theksuar se Policia e Kosovës do duhej kushtuar vëmendje më të lartë rasteve të djegies së veturave që po bëjnë ndryshimin e targave.