Komisioni Qeveritar për Persona të Pagjetur ka konfirmuar identifikimin e mbetjeve mortore të Elhami (Qamil) Tahiragës nga Rahoveci, i cili figuroi në listën e personave të zhdukur gjatë luftës në Kosovë.
Në njoftim, Komisioni ka bërë të ditur se identifikimi është realizuar përmes analizës së ADN-së, ndërsa familja Tahiraga është informuar zyrtarisht nga Instituti i Mjekësisë Ligjore.
“Komisioni Qeveritar për Persona të Zhdukur, së bashku me Institutin e Mjekësisë Ligjore, ka informuar zyrtarisht familjen Tahiraga mbi rezultatet e procesit të identifikimit. Me këtë rast, Komisioni Qeveritar për Persona të Zhdukur shpreh solidaritet dhe mbështetje të sinqertë familjes Tahiraga, duke shpresuar që ky identifikim t’u sjellë sadopak lehtësim pas një pritjeje të gjatë e të dhimbshme”, thuhet në njoftimin e Komisionit.
Ndërkohë, të martën, i njëjti Komision ka njoftuar se janë identifikuar edhe mbetje mortore të tre viktimave të Masakrës së Kralanit, të cilët ishin zhdukur që nga lufta e vitit 1999.