Instituti Kombëtar i Shëndetësisë Publike të Kosovës (IKSHPK), i bën thirrje prindërve të sigurojnë që fëmijët e tyre të vaksinohen me vaksinën MMR (Fruth, Shyta dhe Rubella), në kuadër të mbrojtjes së shëndetit publik dhe parandalimit të përhapjes së sëmundjeve ngjitëse.
Sipas njoftimit, gjatë periudhës janar-mars 2025, janë regjistruar disa raste sporadike me fruth në Kosovë, ndërkohë që vaksina MMR mbetet mënyra më e sigurt për ta parandaluar atë.
Kur duhet të vaksinohen fëmijët?
- Doza e parë: 12-15 muaj.
- Doza e dytë: 5-6 vjeç. Nëse fëmija ka humbur dozat sipas kalendarit, mund të vaksinohet në çdo moshë pas 6 vjeçare.
Po ashtu, në njoftim thuhet se për shkak të rasteve të fruthit në Kosovë dhe vendet fqinje, vaksinimi është thelbësor për të parandaluar shpërthime dhe për të siguruar shëndetin e fëmijëve.
Fëmijët mund të vaksinohen në Qendrën e Mjekësisë Familjare më të afërt.