Presidentes së Kosovës, Vjosa Osmani, iu tentua t’i merrej telefoni personal nga një pjesëtar i sigurimit në Aeroportin e Shkupit, për këtë ka reaguar kabineti i kryetarit të Kuvendit të Maqedonisë së Veriut, Afrim Gashi.
Kabineti i Gashit ka deklaruar se pjesëtarët e sigurimit të tij nuk ishin të përfshirë në incident, por përkundrazi, ndërhynë për ta qetësuar situatën.
“Përkundër këtyre informacioneve, pjesëtarët e sigurimit të kryeparlamentarit Gashi, të cilët janë të punësuar në Ministrinë e Punëve të Brendshme, kanë ndërhyrë për ta qetësuar situatën dhe për t’i udhëzuar kolegët e tyre për procedurat e sigurisë gjatë vizitës së personave VIP. Me këtë rast theksojmë se çdo raportim që e sugjeron të kundërtën është tendencioz. Pas kësaj, u bëjmë thirrje edhe mediave që kanë raportuar për këtë ngjarje, që ta verifikojnë informacionin e tyre para se të publikojnë pretendime të tilla dhe të veprojnë me përgjegjësi profesionale dhe etike,” thuhet në deklaratën e kabinetit të Gashi dërguar mediave, transmeton Klan Maqedoni.