Ish-drejtori i burgjeve të Kosovës, Sokol Zogaj, ka komentuar arratisjen e Faton Hajrizit nga Qendra Korrektuese e Smrekonicës, duke theksuar se transferimi i tij në një institucion të tipit të hapur ishte një gabim.
Hajrizi, i cili është arratisur nëntë herë që kur u arrestua për vrasjen e një ushtari rus në Skenderaj në vitin 1999, nuk duhej të ishte transferuar në Smrekonicë, sipas Zogajt.
“Pasi ka ende ato qëndrime me u largu, me ikë prej burgut, nuk është dashtë me ardhë në Smrekonicë fare. Është me mbetë në burgun Sigurisë së Lartë apo në Dubravë, apo në qendra tjera të paraburgimit. Por shiko kush ka vendos nuk e di, po aty është përgjegjësi që e kanë sjellë”, tha Zogaj gjatë një intervistë në emisionin “Rreth e Rrotull” të Dukagjinit.
Ai gjithashtu theksoi se procesi i risocializimit për Hajrizin nuk ishte në nivelin e duhur dhe se vendimi për transferimin e tij duhet të ishte bazuar në një vlerësim më të detajuar nga psikologët dhe sociologët.
“Nuk e di sa ka qenë qasja e psikologut dhe sociologut në këtë rast dhe të tjerëve, mirëpo gabimi është lëshuar. Procesi i risocializimi nuk është në nivelin e duhur, Fatoni ia ka shkelë”, ka thënë Zogaj, në “Rreth e Rrotull” të Dukagjinit.
Faton Hajrizi lajmërohet nga arratia: Provokimet me shtynë të arratisem nga burgu
Ndërkaq, Hajrizi është lajmëruar nga arratia mbrëmë në rrjetin social TikTok.
Me një maskë në fytyrë, Hajrizi ka sqaruar arsyet e arratisjes dhe ka theksuar se nuk po fsheh fytyrën, por kishte pësuar një lëndim gjatë arratisjes. Hajrizi, në videon e tij, deklaroi se planifikon të hyjë live në “TikTok” për të folur më gjerësisht për situatën.
Gjatë arratisjes, siç tregon Hajrizi kishte përjetuar vështirësi me telat dhe murin e burgut, të cilat i shkaktuan lëndime në fytyrë. Në video, ai falënderoi përkrahësit e tij dhe adresoi kritikat, duke theksuar se nuk është ashtu siç e përshkruan policia.
“Dikush mund të thotë që këtij personi i është bërë hobi të ik nga burgu, por nuk është e vërtetë. Unë dua të jem i lirë si të gjithë shqiptarët. Nuk jam Albin Kurti unë me u mërzit për Izraelin a Ukrainën a janë të lirë. Arsyeja pse unë jam kanë me datën 1 dhe jam kthyer me datën 3 në vikend, arsyeja pse nuk kam ikur gjatë vikendit është pikërisht për shkak se kam dhënë fjalën se nuk iki nga vikendi”, ka thënë Hajrizi.
Hajrizi vuri në dukje trajtimin e padrejtë që pretendon që ka marrë në burg. Dhe, sipas tij, provokimet e zyrtarëve të Qendrës Korrektuese në Smrekonicë e kanë shtyrë të arratiset, teksa pohoi se ka marrë vendimin për t’u arratisur përkohësisht, por do të kthehet për të përfunduar dënimin e mbetur, në kohën që do të vendosë vetë.