Ish e burgosura politike Fexhrije Shala, aktivitetin e saj ilegal kundër ish-Jugosllavisë e kishte filluar që nga mosha e hershme e fëmijërisë.
Si pasojë ajo ishte nën vëzhgim nga pjesëtarët e shërbimit sekret serb të asaj kohe. Në një rrëfim të sajin në “Debat Plus”, ajo tregon se si ishin identifikuar dy shokët e saj të lëvizjes ilegale.
“Janë arrestu paraprakisht shokët e mi. Kam qenë në Maqedoni, në Kërqovë. Shokët e mi të ilegales, dy ditë pa u kthy unë, i kanë nxënë në Drenicë duke shpërnda panfleta. Bekimit e Agronit ia kanë marrë letërnjoftimet, mirëpo ka qenë ora 9 apo 10 në mramje, i kanë ikë për duarve, në errësire kanë ardhë në këmbë prej Drenice në Prishtinë. E kanë ditë që unë jam në Maqedoni, kanë ardhë te Afërdita. Ajo ka qenë simpatizante. Kanë qenë të ndamë personat e organizum që kanë qenë celula, dhe simpatizantë që kanë marrë në protesta por s’kanë qenë të organizuar, s’kanë qenë pjesë e celulës”, tha ajo.
Ajo nuk lë pa e përmendur edhe ndihmën që ia kishte ofruar vazhdimisht babai i saj i cili e kishte informuar se dy shokët e saj ishin ekspozuar.
“Pas dy ditëve jam kthy, më ka thirr baba. Ai ka qenë i vetdishëm për cdo veprim timin. Më ka ndihmu shumë… për një vajzë në atë kohë me dalë pas orës një, ka qenë problematike, ka qenë edhe për meshkuj e le për ne. E kam pas mbështetjen e babës tim. Kur u ktheva u takova me Bekimin dhe Agronin, ata ishin ekspozu. U mundojshëm me bë përgatitjen kishin ra në kontakt me Shaban Mujën, me i qit në ilegalitet të plotë. I qitshim jashtë shtetit. Me pasaporta falso, kogjo peripeci”, tha ajo.
Në vazhdim ajo rrëfen se si ishin arrestuar Bekimi, Agroni e Afërdita. Kjo sipas saj ndodhi diku 35 minuta para se babai i Afërditës i kishte treguar vëllait të tij se po i mbante për strehim disa persona.
Ajo hodhi dyshim se ishte xhaxhai i Afërditës ai i cili ka mundur t’i spiunojë.
“Pastaj ka ardhë axha i Afërditës, e përcjellsha për dritare. I ka tregu baba i Afërditës për shokët që i kemi aty. Unë s’mujsha me i thënë pse i the? S’ish në dorën time, isha në dorën e atyre. Ishte e papritur. Fiks pas 35 minutave na kanë rrethu te shtëpia e Afërditës, aty janë arrestu Bekimi, Agroni, Afërdita, mu s’më kanë arrestu. Ata kanë pasur informata që unë nuk jam aty. Kanë mendu që jam motra e Afërditës. Masi janë tërhek e kanë kuptu që jam edhe une aty. Më kanë lënë 10 ditë pasi i kanë arrestu, cdo hap kam qenë duke u përcjellor”, tha ajo.
Pas arrestimit të miqve të saj, Fexhrie Shalës iu shtua rreziku e përcjellja. Asaj i ishte ofruar mundësia e kalimit në ilegalitet të plotë e për të dalë jashtë Kosovës. Një gjë të tillë Shala nuk e kishte pranuar asnjëherë.
Si pasojë, ajo do arrestohej dhjetë ditë më vonë.