Ish i burgosuri politik, Bajrush Xhemajli, ka rrëfyer ekskluzivisht në “Debat Plus” të Televizionit Dukagjini për torturat çnjerëzore të shkaktuar nga disa shqiptarë që ishin pjesë e Drejtorisë/Agjencisë së Sigurimit Shtetëror, e njohur si UDB-ja.
Xhemajli ka thënë se ai kishte filluar të merret me veprimtarinë e tij të “fshehtë” qysh në bankat e shkollës së mesme, respektivisht nxënës i vitit të tretë të gjimnazit. Ai kujton se fillimisht kontaktet e para kanë qenë me vëllain e tij, Mustafë Xhemajli e pastaj edhe Rrahim Sadiku.
Xhemajli kujton se ai ka vazhduar të veprojë për bazën e “shokëve të idealit në luftën për liri të Kosovës.
“Veprimtaria ime e fshehtë ka filluar qysh në bankat e shkollës së mesme, aty diku vitin e tretë. Kam rënë në kontakt për herë të parë me njerëz që kanë vepruar, siç ishin me vëllain tim, Mustafën dhe Rrahim Sadiku. Kam vepruar dhe vazhduar në bazën e shokëve të idealit që na ka bashkuar në luftë për liri të Kosovës dhe jo vetë në vëllazërisë.
E fillova me vëllezër, nuk i ndaj me gjini. Në familje kemi filluar, prej nënës deri te Lumnija kemi qenë pjesëmarrës në luftën për liri. Kam edhe një motër tjetër, me Nazifen e cila është dënuar dy herë, kur herën e parë është dënuar me 4 vite bashkë me mu dhe një herë në mungesë, e cila ka qenë shtatzanë dhe e ka shfrytëzuar dhe ka ikur jashtë vendit. Aktualisht jeton në Lozan në Zvicrës.
Mustafa ka qenë gazetar dhe është poet, është pensionist. Ka ikur në kohën kur i kanë rënë në gjurmë. Janë burgosur edhe dy gazetarë të tjerë, intelektual Sherif Konjufca dhe Ismet Dugolli. Celula e televizionit. Pastaj, Rrahim Sadiku, Emin Krasniqi kanë qenë përfaqësues të medias”, rrëfeu Xhemajli.