Ish-ministri i Administrimit të Pushtetit Lokal, Sadri Ferati, në një lidhje direkte në edicionin special për votimet në veri në RTV Dukagjini, ka thënë se për bojkotimin e votimeve në veri, Beogradi e mban gjithë përgjegjësinë, e që sipas tij, përmes Listës Serbe ka thirrur bojkot.
Ferati ka thënë se çështja e shkarkimit të kryetarëve është e përcaktuar me ligjin për vetëqeverisjen lokale dhe se gjithçka që po ndodh është legale dhe konform ligjeve të Republikës së Kosovës.
“Një prej formave të shkarkimit të kryetarëve është edhe organizimi i peticioneve e pastaj i votimit, dhe deklarimi i qytetarëve nëse janë për shkarkimin e kryetarëve apo jo, e pastaj organizimi i zgjedhjeve”, ka thënë Ferati.
Ai ka thënë se bojkoti nga Lista Serbe nuk ka ardhur rastësisht, sepse, sipas tij, ata kanë pasur dilema nëse ata mund t’ia dilnin.
“Edhe ashtu ata kanë parë disa probleme, sepse bojkoti nuk ka ardhur rastësisht, sepse e kanë parë që ka dilema nëse ata mund t’ia dalin”, është shprehur ish-ministri.
Ferati është shprehur se që tani rezultati shihet, dhe se ai është që nuk do të ketë ndryshime, dhe se kryetarët aktualë do ta vazhdojnë mandatin e tyre.