Ish-ministrja e Punëve të Jashtme, Meliza Haradinaj-Stublla, ka deklaruar se edhe pas pesë muajsh nga sulmi terrorist në Banjskë dhe vrasja e policit Afrim Bunjaku, ende nuk ka aktakuzë të ngritur ndaj Milan Radoiçiqit.
Nëpërmjet një postimi në platformën X, Haradinaj-Stublla ka thënë gjithashtu se Lista Serbe ende vazhdon të financohet nga shteti i Kosovës.
“Pesë muaj nga sulmi në Banjskë dhe vrasja e Afrim Bunjakut! Ende nuk ka aktakuzë për Radojçiqin që pranoi krimin, dhe Lista Serbe ende vazhdon të financohet nga shteti i Kosovës (me votë të të gjitha partive politike) me 360 mijë euro nga KQZ dhe 250 mijë euro nga Kuvendi i Kosovës!”, ka shkruar ajo në X.
Më 24 shtator, një grup i serbëve të armatosur e sulmoi Policinë e Kosovës në Banjskë të Zveçanit, duke e vrarë rreshterin Afrim Bunjaku.
Sipas policisë, gjatë shkëmbimit të zjarrit u vranë edhe tre sulmues.
Përgjegjësinë për sulmin terrorist e mori Millan Radoiçiq, ish-nënkryetari i Listës Serbe, partisë kryesore të serbëve në Kosovë, që ka mbështetjen e Beogradit zyrtar.