Ministria e Shëndetësisë ka bërë të ditur se shteti i Japonisë i ka dhuruar spitaleve të Kosovës pajisje mjekësore.
Ministri i Shëndetësisë, Rifat Latifi, ka falënderuar Qeverinë japoneze për përkrahjen ndaj institucioneve dhe popullit të Kosovës.
Këtë falënderim, ministri Latifi e bëri në ceremoninë e pranimit të pajisjeve mjekësore, të cilat janë donacion nga Qeveria e Japonisë për Spitalin e Përgjithshëm, “Dr. Sami Haxhibeqiri” në Mitrovicë.
“Sot po pranojmë një mbështetje të jashtëzakonshme, kësaj radhe, përmes grandit të Qeverisë së Japonisë, janë siguruar: DIAGNOSTIC ULTRASOUND SYSTEM –Xario 200G MODEL CUS-X200G. Përpos Spitalit të Përgjithshëm të Mitrovicë, përfitues janë edhe Spitali i Gjakovës, Gjilanit dhe Ferizajt, grand ky i cili ka sjellë në Kosovë pajisje që nga viti 2021”, ka deklaruar ministri Latifi.
Sipas ministrit Latifi, ky kontribut do ta përmirësojë dukshëm infrastrukturën spitalore në këto katër spitale rajonale, ndërsa pacientëve do t’u lehtësohet shërbimi mjekësor. Latifi pranimin e këtyre pajisjeve e cilëson si një transformim të infrastrukturës spitalore në Kosovë.