Kryetari i SBAShK-ut, Rrahman Jasharaj pas takimit me kryeministrin e Kosovës, Albin Kurti dhe drejtoreshës së Unionit të Sindikatave të Arsimit të Evropës, ka potencuar se greva ende vazhdon.
Këtë ai e ka bërë të ditur në një konferencë për media, i cili ka thënë se edhe pas vizitës së kryesindikalistes për arsim, Flocken dhe mbështetjes së saj për grevistët ende nuk ka ndonjë lëvizje nga Qeveria e Kosovës.
“Me gjithë argumentet dhe mbështetjen e paraqitur nga zonja Flocken, duket se Qeveria nuk ka ndërruar në qëndrimet e veta”, është shprehur Jasharaj.
Ai ka thënë ndër të tjera se vetë fakti se nuk ka ndonjë lëvizje nga Qeveria, grevat ende vazhdojnë.
Ndërsa në pyetjen se a do të zëvendësohen orët e humbura, Jasharaj është shprehur se në kontratë kolektive të arsimit precizohet saktë se orët e humbura në grevë nuk zëvendësohen, “përveçse ato që humben për shkak të një fatkeqësie si pandemia ose diçka tjetër”.
Ndërsa Flocken është shprehur se ka qenë këtu për të dhënë mbështetjen e saj për SBAShK-un por që ka shprehur keqardhje për moszgjidhje të situatës.