Kompania Kosovare për Furnizim me Energji Elektrike (KESCO), ka njoftuar se nga nesër (01.04.2025) e deri më 30 shtator, tarifa e ulët e rrymës është nga ora 23:00 deri në ora 08:00.
Ndërkaq, tarifa e lartë (ditë) aplikohet prej orës 08:00 – 23:00. Dhe ndryshimi i faturës verore vjen pas ndryshimit të orës.
Nga dje [e diel] ka filluar llogaritja verore e orës. Akrepat e orës janë zhvendosur një orë përpara, pra nga ora 02:00 e mëngjesit, në orën 03:00 të mëngjesit.
Ndërkohë, nga Zyra e Rregullatorit të Energjisë (ZRRE) ka kohë që paralajmëruar shtrenjtimi i energjisë elektrike për 15% nga muaji prill. Një grup i organizatave të shoqërisë civile ka dorëzuar një deklaratë kundërshtuese ndaj këtij propozimi.
Sipas deklaratës së këtyre organizatave, e publikuar nga organizata ‘Balkan Green Foundation’, zbatimi i një rritjeje prej 15% të tarifave të energjisë elektrike do të rëndojë më tej barrën financiare të familjeve dhe qytetarëve në Kosovë.