Çdo vendim për hapjen e Urës së Ibrit duhet të bëhet në kuadër të dialogut Kosovë – Serbi, thotë KFOR-i.
KFOR-i ka thënë se njësitet e saj mbajnë një prani të përhershme, fikse në urë dhe vazhdojnë të kryejnë patrullime të rregullta në zonat përreth për të garantuar stabilitet dhe siguri.
Po ashtu, misioni paqeruajtës në Kosovë, KFOR, ka bërë të ditur se herët në mëngjes, komandanti i KFOR-it, gjeneralmajor Özkan Ulutaş, është njoftuar nga drejtori i Policisë së Kosovës për një inspektim teknik në urën kryesore mbi lumin Ibër.
“Këtë mëngjes, komandanti i KFOR-it, gjeneralmajori Ozkan Ulutash, është informuar nga drejtori i Policisë së Kosovës për një inspektim teknik në urën kryesore mbi lumin Ibër, në Mitrovicë, që do të ndodhë së shpejti. Njësitë e KFOR-it mbajnë një prani të përhershme, fikse në urë dhe vazhdojnë të kryejnë patrullime të rregullta në zonat përreth për të garantuar stabilitet dhe siguri, për përfitimin e të gjitha komuniteteve”, thuhet në njoftim.
Tutje, KFOR ka potencuar se nuk do të hezitojë të reagojë ndaj asnjë zhvillimi që mund të ndikojë në ambientin e sigurisë.
“Ne nuk do të hezitojmë të përballemi me asnjë zhvillim që mund të ndikojë në ambientin e sigurisë dhe stabilitetin rajonal, duke respektuar plotësisht mandatit tonë që buron nga OKB-ja. Qëndrimi i KFOR-it ka qenë i qartë dhe konstant gjatë gjithë kohës. Çdo vendim në lidhje me hapjen e urës kryesore mbi lumin Ibër duhet të bëhet përbrenda kornizës së dialogut të ndërmjetësuar nga BE-ja mes Beogradit dhe Prishtinës”, thuhet tutje në njoftim.