Është sulmuar një burg në Ukrainën lindore e cila kontrollohet nga separatistët, ndërsa Rusia dhe Ukraina po akuzojnë njëra-tjetrën për bombardimin e këtij burgu.
Ministria ruse e mbrojtjes ka thënë se forcat ukrainase “qëlluan në burgun ku mbahen anëtarët e batalionit Azov, duke përdorur predha amerikane nga sistemi HIMARS”.
Si pasojë sulmit në burgun Olenivka të paktën 40 robër ukrainas janë vrarë dhe 84 të tjerë janë plagosur, por sipas autoriteteve pro-ruse në rajonin Donetsk kanë mbetur të vdekur 53 persona.
Ushtria ukrainase ka thënë se “nuk kryen kurrë” sulmet ndaj infrastrukturës civile ose robërve të luftës.
Dhjetëra ushtarë ukrainas janë dërguar në burgje në zonat e kontrolluara nga Rusia si rajoni Donetsk, një zonë e shkëputur në Ukrainën lindore e cila drejtohet nga autoritetet separatiste të mbështetura nga Rusia, raporton euronews.
Ndërsa duke folur për bombardimin e burgut, Ministria ruse e Mbrojtjes ka shtuar se: “Ky provokim i egër synon të trembë ushtarët ukrainas dhe t’i shkëpusë ata të dorëzohen”.
Ukraina ka mohuar që mund të ketë shënjestruar infrastrukturën civile ose të burgosurit e luftës, duke theksuar se ushtria e saj “i përmbahet plotësisht parimeve dhe standardeve të së drejtës ndërkombëtare humanitare”.
Shtabi i Përgjithshëm i Ukrainës ka akuzuar ushtrinë ruse se qëndron pas këtij “bombardimi artilerie në shënjestër”, me qëllim që të pretendonte se Ukraina kishte “kryer krime lufte dhe të mbulonte torturat e të burgosurve dhe ekzekutimet që ata kryenin atje”.