Komandanti i Forcës së Sigurisë së Kosovës (FSK), gjenerallejtënant, Bashkim Jashari të mërkurën e 21 dhjetorit ka pritur me ceremoni zyrtare shefin e mbrojtjes së Gjermanisë, gjeneral Eberhard Zorn.
Sipas njoftimit nga FSK, të dy gjeneralët kanë diskutuar për situatën e sigurisë në Kosovë, rajon dhe me gjerë.
Në njoftim thuhet se është diskutuar edhe për bashkëpunimin e afërt që FSK-ja e gëzon me ushtrinë gjermane dhe potencialin për zgjerimin e këtij bashkëpunimi.
“Më këtë rast gjeneral Jashari falënderoi gjeneralin Zorn për përkushtimin e tij dhe të ushtrisë gjermane për të ndihmuar FSK-në në ngritjen dhe zhvillimin e kapaciteteve ushtarake. Ushtria gjermane është njëra nga kontribuuesit më të mëdhenj me trajnime, ekspertizë dhe donacione të pajisjeve ushtarake për FSK-në, me fokus logjistikën”, thuhet në njoftimin e FSK-së.
Në fund të vizitës, u shfrytëzua rasti që pala Gjermane zyrtarisht t’i dorëzojë FSK-së donacion veshje mbrojtëse specialistike kundër mjeteve shpërthyese për Specialistët e Ekipeve për Eliminimin e Mjeteve të Pashpërthyera Eksplozive (EOD), të Kompanisë së Deminimit të FSK-së.