Mbi 6 mijë e 900 euro janë konfiskuar nga Policia e Kosovës gjatë 24-orëshit të fundit, pasi dyshohet të jenë të falsifikuara.
Kështu bëhet e ditur në raportin 24-orësh të policisë, ku theksohet se ato janë konfiskuar pas raportimit në dy raste të ndryshme, njëri në Graçanicë e tjetri në Fushë-Kosovë.
“Preoc, Graqanicë 27.12.2023-09:20. Dy ankuese femra kosovare-zyrtare të bankës, kanë raportuar se kohët e fundit, nga klient të ndryshëm janë deponuar monedha metalike të cilat dyshohet se janë të falsifikuara, gjithsejtë 3295 x 2€ në vlerë 6590 €, të cilat janë konfiskuar për ekzaminime të mëtutjeshme. Është njoftuar prokurori”, thuhet në raportin e policisë.
Ndërkaq, në Fushë-Kosovë, në një bankë janë deponuar 364 euro, që dyshohet të jenë të falsifikuara.
Sipas njoftimit, thuhet se monedhat janë sekuestruar për ekzaminime të mëtejshme.
“Te-Rrethi, Fushë-Kosovë, 11.12.2023. Me 27.12.2023 ankuesja femër kosovare, zyrtare e bankës, ka raportuar se klient të ndryshëm nga data e cekur kanë deponuar 364 € monedha të ndryshme metalike, shumica prej tyre në vlerë 2 €, të cilat dyshohet të jenë të falsifikuara. Monedhat janë sekuestruar për ekzaminime të mëtejshme, është njoftuar prokurori”, thuhet në raportin e policisë.