Në një operacion të koordinuar nga Inspektorati i Ministrisë së Mjedisit dhe Planifikimit Hapësinor (MMPHI), Njësiti për Hetimin e Krimeve Mjedisore, dhe zyrtarët e Parkut Kombëtar “Bjeshkët e Nemuna”, janë zbuluar disa ndërtime ilegale në zonën e Bjeshkëve të Strellcit.
Ministri Liburn Aliu bëri të ditur se gjatë inspektimeve, autoritetet hasën në makineri dhe pajisje të ndryshme që ishin në përdorim për aktivitete të paligjshme, përfshirë gërmimin dhe përgatitjen e terrenit për ndërtim në prona publike.
“Inspektorati i MMPHI, Njësiti për Hetimin e Krimeve Mjedisore, zyrtarët e PK “Bjeshkët e Nemuna”, në kuadër të aktiviteteve të Task Forces së Gjelbër inspektuan disa ndërtime ilegale në Bjeshkët e Strellcit. Gjatë inspektimit janë hasur makineri e pajisje të ndryshme duke ushtruar veprimtari ilegale, përkatësisht gërmim dhe përgatitje të terrenit për ndërtim në prona publike”, thuhet në njoftim.
Sipas Aliut makineritë e sekuestruar janë konfiskuar me urdhrin e prokurorit dhe janë ngritur kallëzime penale ndaj individëve të përfshirë në këto aktivitete të paligjshme.
“Për të adresuar këto shkelje, janë ndërmarrë veprime të menjëhershme me ç’rast: makineritë janë sekuestruar me urdhrin e prokurorit, dhe në bashkëpunim me policinë, janë ngritur kallëzime penale ndaj individëve të përfshirë.MMPHI është e përkushtuar për mbrojtjen e mjedisit dhe pasurive natyrore dhe do të vazhdojë të ndjekë me rigorozitet çdo rast të shkeljes së ligjit për të siguruar kështu ruajtjen e resurseve të vendit tonë”, thuhet në njoftim.