Sot është nënshkruar memorandumi i Mirëkuptimit në mes të Kosovës dhe Britanisë së Madhe. Kjo marrëveshje është nënshkruar në mes të ministrit të Mbrojtjes, Ejup Maqedonci dhe ministrit të Forcave të Armatosura të Mbretërisë së Bashkuar, Leo Docherty.
Kështu ka bërë të ditur vetë ministri, i cili ka thënë se kjo marrëveshje do të formësojë më shumë bashkëpunimin në fushën e mbrojtjes ndërmjet dy shteteve.
Në këtë marrëveshje përfshihet dhe koordinimi për mbështetjen e integrimit të Kosovës në NATO.
“Kjo marrëveshje që do të formësojë edhe më tej bashkëpunimin e shkëlqyeshëm bilateral në fushën e mbrojtjes ndërmjet dy vendeve tona, përfshinë koordinimin për mbështetjen e integrimit të Republikës së Kosovës në NATO, realizimin e ushtrimeve dhe trajnime të përbashkëta, mbështetje dhe trajnime për operacione ndërkombëtare dhe misione ushtarake, si dhe shkëmbim përvojash në fusha të tjera”, ka thënë Maqedonci.
Ministri është shprehur se Ministria e Mbrojtjes e Kosovës është mirënjohëse ndaj Mbretërisë së Bashkuar për mbështetjen e vazhdueshme në zhvillimin e kapaciteteve mbrojtëse të vendit tonë.