Në ambientet e Ambasadës së Republikës së Kosovës në Dhaka të Bangladeshit, këtë të mërkurë u bë përurimi i shërbimit konsullor.
Me këtë rast, zëvendësministri i Punëve të Jashtme dhe Diasporës, Kreshnik Ahmeti, i ka dhënë vizën e parë të lëshuar nga kjo ambasadë një shtetaseje nga Bangladeshi.
“Pas fjalës përshëndetëse nga ambasadori Güner Ureya dhe sekretari i Ministrisë së Punëve të Jashtme të Bangladeshit, Shabbir Ahmad Chowdhury, zëvendësministri Kreshnik Ahmeti i dha vizën e parë të lëshuar nga Ambasada e Republikës së Kosovës në Dhaka, Meliha Iqbal”, thuhet në njoftimin për media të MPJD-së.
Ndërsa, vajza e cila mori vizën e Kosovës, Meliha Iqbal, do të marrë pjesë në Forumin për Gratë, Paqen dhe Sigurinë që do të mbahet në këtë muaj në Prishtinë.
Po ashtu, të pranishëm në këtë ngjarje ishin përfaqësues të institucioneve shtetërore të Bangladeshit si dhe ambasadorë dhe diplomatë të akredituar në Bangladesh.