Kryeministri i Maqedonisë së Veriut, Dimitar Kovaçevski, pas takimeve me kryeministrin e Kosovës, Albin Kurti dhe presidentin serb, Aleksandër Vuçiq ka deklaruar se ka inkurajuar palët që të kenë një ditë produktive duke u treguar konstruktivë.
Ohri i Maqedonisë është vendi i takimit ku do të zhvillohet pjesa tjetër e dialogut Kosovë-Serbi. Nikoqiri i këtij takimi ka zhvilluar takime individuale me të dy negociatorët e palëve të dialogut dhe para fillimit të takimit zyrtar, në fjalën e tij për media ka bërë të ditur se u ka uruar fat.
“Këtë mëngjes me kërkesën time, u takova me presidentin Vuçiq dhe kryeministrin Kurti. Do të doja që personalisht të potencoj rëndësinë që ne, si të qenurit shtet fqinj i Kosovës dhe Serbisë, t’ju uroj sukses në këtë dialog, sepse besoj që është e rëndësishme dhe mënyra e vetme drejt një zgjidhjeje në një botë demokratike në shekullin e 21”, ka deklaruar ai.
Ai ka inkurajuar palët të jenë konstruktive në dialog.
“I inkurajoj palët të jenë konstruktive dhe të ketë një ditë produktive”, ka deklaruar ai.