Komisioni Qendror Zgjedhor (KQZ), është duke e trajtuar afatin për aplikim dhe certifikim të subjekteve dhe kandidatëve politikë që duan të marrin pjesë në zgjedhjet e parakohshme në veri.
“Ju njoftoj se çështja e ndryshimit të disa afateve të aktiviteteve zgjedhore, në mesin e të cilave edhe afati për aplikim për certifikim të subjekteve politike dhe kandidatëve që duan të marrin pjesë në këto zgjedhje, është duke u trajtuar dhe do t’iu njoftojmë me kohë gjatë ditës”, thuhet në njoftim
Po ashtu, KQZ-ja, ka njoftuar se e kanë pranuar kërkesë për certifikim për pjesëmarrje në zgjedhjet e jashtëzakonshme në komunën e Mitrovicës së Veriut.
Subjekti, Iniciativa Qytetare Mitrovica, e ka dorëzuar kërkesën për pjesëmarrje në këto zgjedhje.
“Deri më tani (21 nëntor, 14:00) KQZ-ja ka pranuar një kërkesë për certifikim për pjesëmarrje në zgjedhjet e jashtëzakonshme për kryetar të komunës së Mitrovicës së Veriut. Subjekti politik Iniciativa Qytetare Mitrovica ka dorëzuar kërkesën për pjesëmarrje në zgjedhjet e jashtëzakonshme për kryetar të komunës së Mitrovicës së Veriut”, thuhet në njoftim.
Ndryshe Lëvizja Vetëvendosje ka kërkuar që të mbahet një mbledhje e jashtëzakonshme e Komisionit Qendror të Zgjedhjeve për të shtyrë afatin për regjistrim të partive politike në zgjedhjet e jashtëzakonshme për kryetar komune në veri të Kosovës.
Lajmin e ka konfirmuar për RTV Dukagjini anëtari i KQZ-së nga VV-ja, Alim Rama. Ai megjithëkëtë ka mohuar se kjo kërkesë ka të bëjë me zhvillimet politike në Bruksel dhe mundësinë e kthimit të serbëve në institucionet e Kosovës.