Kryetari i Partisë Demokratike të Kosovës, Memli Krasniqi, ka bërë të ditur se gjatë takimit me emisarin e BE-së për dialogun Kosovë-Serbi, Miroslav Lajçak, e ka njoftuar se partia e tij nuk do ta votojë marrëveshjen aktuale për normalizimin e marrëdhënieve ndërmjet Kosovës dhe Serbisë.
Krasniqi, gjatë konferencës për media, ka thënë se marrëveshja me Serbinë pa njohje reciproke nuk i jep fund konfliktit të ngrirë, dhe si e tillë, është e papranueshme për këtë palë.
Se kjo marrëveshje nuk ka njohje, Krasniqi e bën fajtor kryesor kryeministrin Albin Kurti.
Ai ka thënë se dy vitet e fundit nuk ka arritur ta bindë bashkësinë ndërkombëtare se marrëveshja përfundimtare duhet të përfshijë njohje reciproke.
“Biseduam me theks të veçantë për procesin e dialogut dhe për marrëveshjen e propozuar. Ia shpreha qëndrimin e PDK-së rezervat që i kemi sa i përket marrëveshjes. Ne kemi qenë mbështetës të procesit të dialogut në vazhdimësi, duke pritur përfundim me njohje finale të ndërsjellët. Ajo që kemi sot në tavolinë është marrëveshje e përkohshme me Asociacionin në qendër, padyshim s’mund të flasim për produktin pa folur për rrugën si kemi arritur këtu”, ka thënë Krasniqi.
“Përgjegjësia e kryeministrit Kurti është direkte sepse ai për dy vite ka humbur mundësinë të bindë mbështetësit tanë që të arrihet marrëveshja finale dhe njohja e ndërsjellët që ka qenë qëllimi kryesor. Sot nuk kemi marrëveshje finale, sot kemi një marrëveshje të përkohshme, kemi Asociacionin të cilin ne nuk e votojmë. E kundërshtoj sepse ai duhet të jetë me Kushtetutën e Kosovës”, ka vijuar ai.
Kreu i PDK-së ka deklaruar se nuk do ta përkrahin në Kuvend kur vjen për ratifikim.