Kryetari i Partisë Demokratike të Kosovës (PDK), Memli Krasniqi, ka akuzuar Lëvizjen Vetëvendosje (VV) për shkeljen e Kushtetutës gjatë mandatit të saj të kaluar dhe ka theksuar se nuk do të lejohet që legjislatura e re të nisë duke shkelur ligjin.
Gjatë një deklarate për media, Krasniqi ka theksuar se VV-ja ka krijuar një situatë të paprecedentë në Kuvend, duke e konsideruar letrën e dorëheqjes së kryeministrit dhe ministrave para betimit si deputetë si një shkelje e vazhdueshme e Kushtetutës për katër vjet rresht.
“Situata që ka krijuar VV-ja është e paprecedentë. Ata vetë e kanë shkelur ligjin për Qeverinë, ku është shkruar qartë që kryeministri dhe ministrat nuk mund të betohen si deputetë. Katër vjet e kanë shkelur Kushtetutën”, ka deklaruar Krasniqi.
Krasniqi shtoi se, sipas tij, logjika e kryeministrit Albin Kurti do të duhej të përfshinte edhe kryetarët e komunave si pjesë të betimit të deputetëve, duke përmendur si shembull Bedri Hamzën, i cili duhet të ishte gjithashtu pjesë e këtij procesi.
“Me logjikën e Kurtit, do të duhej që edhe kryetarët e komunave, përfshirë Bedri Hamzën, të ishin këtu”, ka shtuar ai.
Krasniqi ka bërë të qartë se PDK-ja nuk do të lejojë që ky mandat i ri të fillojë me shkelje të Kushtetutës.