Kryetari i Partisë Liberale Egjiptiane (PLE), Veton Berisha, pas takimit me kryeministrin në detyrë, Albin Kurti, për formimin e qeverisë së re, theksoi se partia e tij nuk ka vija të kuqe me askënd.
Ai tregoi se gjatë takimit ka prezantuar programin e PLE-së dhe kërkesat e komunitetit egjiptian.
Berisha potencoi se Kurti ka filluar një angazhim për të takuar përfaqësues të komuniteteve dhe se PLE-ja, si një parti parlamentare tashmë rikthyer në Kuvend, ka pasur mundësinë të diskutojë mundësinë e një bashkëpunimi.
Ai shtoi se nuk ka asnjë kërkesë të pazgjidhur për të bashkëpunuar me Kurtin ose me ndonjë tjetër në Kosovë.
“Siç e dini, kryeministri Kurti ka filluar një angazhim të tij për të takuar përfaqësuesit e komuniteteve… edhe ne kemi qenë të ftuar. Normalisht, si parti parlamentare, tashmë e rikthyer në kuvend, pas 4 vjetësh dhe pas shumë padrejtësive që na janë bërë si Parti Liberale Egjiptiane, jemi kthyer dhe kemi qenë në llogaritë e kryeministrit, për me u taku. Biseduam për një bashkëpunim të mundshëm midis nesh. Normalisht, ne si PLE, për shkak të kërkesave tona që janë në raport me zhvillimin e komunitetit egjiptian, në parim, nuk kemi asnjë vijë të kuqe, me askënd. As me kryeministrin Kurti, e as me askënd në Kosovë. Ne i patëm kërkesat tona dhe nëse hyjmë në qeveri, kërkuam që me pasë mundësi që me ndiku në politikat qeveritare”, u shpreh Berisha.
Ai po ashtu tha se PLE-ja kërkon mundësinë që të ndikojë në politikat qeveritare, nëse do të bëhet pjesë e qeverisë.
Berisha tregoi se nuk u arrit ndonjë marrëveshje konkrete për formimin e qeverisë gjatë takimit, por që programi i partisë, i cili ka adresuar nevojat e komunitetit egjiptian, është dorëzuar dhe do të diskutohen detajet në takimet e ardhshme.
Ai konfirmoi gjithashtu se PLE-ja do të marrë pjesë në seancën konstituive të Kuvendit më 15 prill, por se për pjesën tjetër të marrëveshjes do të presin një moment kur të jenë të gatshëm për ta finalizuar.