Ismet Kryeziu, nga rrjeti i organizatave joqeveritare Demokracia në Veprim (DnV), e ka kritikuar vendimin e Qeverisë së Kosovës për rritjen e pensioneve në 20%.
Kryeziu thotë se kjo rritje tre muaj para fushatës zgjedhore është veprim për të tërhequr votat e pensionistëve.
“A ka filluar Qeveria të përdorë fondet publike për të ndikuar rezultatin zgjedhor? Rritja e pensioneve me 20% vetëm tre muaj para fushatës zgjedhore është një veprim i qartë politik për të tërhequr votat e një grupi të rëndësishëm siç janë pensionistët. Përpjekja për të fituar vota përmes shpërndarjes së fondeve publike në prag të zgjedhjeve e cenon garën e barabartë zgjedhore, etikën qeverisëse, llogaridhënien dhe transparencën,” ka shkruar Kryeziu në rrjetin social “Facebook”.
Kryeziu tutje ka shtuar se me këtë qasje “kjo mund të jetë vetëm hapi i parë i qeverisë për shpërdorimin e kuletës shtetërore, pa planifikim buxhetor dhe me synim përfitimin e votave.”
Kurti njofton rritjen e të gjitha pensioneve për 20 për qind