Kryetari i Lëvizjes “Odgovor”, Boban Bogdanoviq, ka thënë se është ndaluar në vendkalimin administrativ Merdare në mënyrë të ngjashme me Rada Trajkoviqin dhe se përfaqësuesit e MPB-së së Serbisë nuk e kanë lejuar të hyjë në Serbinë nga territori i Kosovës.
E ky ndalim sipas tij është “revanshizëm politik ndaj kujtdo që kundërshton politikën e Beogradit zyrtar”.
Ai tha se e kishin nxjerrë nga autobusi që udhëtonte në linjën Graçanicë-Beograd dhe se policët i kishin dhënë dy mundësi, të priste vendimin për të në vendkalim ose të kthehej në Kosovë.
“Më afruan pjesëtarë të policisë, ishin shumë profesionistë, më thanë që duhej të lija autobusin dhe të nxirrja gjërat. Me mua ka udhëtuar drejtoresha politike e ‘Odgovor’ Marija Iliq, e cila u solidarizua me mua dhe doli nga autobusi. Në ambientet e policisë më kontrolluan sendet e mia në mënyrë të këndshme, pa presion. Më thanë se kishte një urdhër që të isha këtu, pa shpjeguar pse. Kështu është arrestuar edhe Rada Trajkoviq”, ka thënë Bogdanoviq për N1.
Bogdanoviq tha se arsyeja e pse nuk po e lejojnë ta kalojë në Serbi dhe po e mbajnë në vendkalim, është takimi për kryeministrin, Albin Kurti.
Arsyeja e qëndrimit tim në vendkalim është konferenca për media që u mbajt në Kosovë së bashku me ministrin për Komunitete dhe Kthim, Nenad Rashiq, si dhe takimi me kryeministrin e Kosovës, Albin Kurti, i cili ishte shumë konstruktiv. Kurti tregoi respekt për organizatën politike që unë drejtoj dhe regjistrimi i ‘Odgovor’ në Kosovë është duke u bërë”, tha Bogdanoviq.