Kryeministri i Kosovës, Albin Kurti, të mërkurën e 31 majit do të takohet me përfaqësuesin e lartë të Bashkimit Evropian (BE) për Politikë të Jashtme e Siguri, Josep Borrell dhe emisarin e BE-së për dialogun, Miroslav Lajçak.
Ai do të takojë zyrtarët evropianë në kuadër të Konferencës për Siguri Globale “Globsec 2023” në Bratisllavë.
Këtë e ka bërë të ditur për Dukagjinin, zëdhënësi i Qeverisë së Kosovës, Përparim Kryeziu.
Shefi i ekzekutivit në këtë konferencë do të jetë pjesë e disa paneleve të diskutimit, ndërsa brenda ditës do të jetë në Kosovë.
“Kryeministri Kurti po merr sot pjesë në ditën e fundit të Konferencës për Siguri Globale në Bratislavë. Ndër të tjerash, atje do të takojë Përfaqësuesin e Lartë të BE-së, Borrel dhe emisarin e BE-së, Lajcak si dhe do të jetë pjesë e disa paneleve të diskutimit. Qëndrimi i tij do të jetë njëditor. Brenda ditës do të jetë në Kosovë”, ka thënë Kryeziu.
Kjo vizitë e Kurtit me zyrtarët evropianë vjen pas tensioneve në veri që nisën të premten, ditën kur Policia e Kosovës asistoi kryetarët e sapozgjedhur të komunave veriore të hynë në vendet e tyre të punës.
Një ditë më parë Qeveria e Kosovës kishte deklaruar se pjesëmarrja e kryeministrit në këtë forum është shtyrë për shkak të zhvillimeve në veri, dhe nuk dihej nëse do të merrte pjesë apo jo.
Në anën tjetër, presidenti i Serbisë, Aleksandër Vuçiq, ka thënë se nuk do të shkojë në Bratisllavë, sepse “është më e rëndësishme për të që të jetë me njerëzit e tij”.
Vuçiqi i bëri komentet në llogarinë e tij zyrtare në Instagram.
Kurti arrin në Bratisllavë për të marrë pjesë në konferencën për sigurinë globale