Kryeministri Albin Kurti e ka vlerësuar lart figurën ish-presidentit Ibrahim Rugova për pavarësi.
Në postimin e tij, Kurti e ka përshkruar Rugovën si një figurë që përfaqësonte “fjalën e qetë dhe të urtë, me punën e vazhdueshme dhe të durueshme”, duke e cilësuar atë si një simbol të politikave për liri, demokraci dhe pavarësi në Kosovë dhe jashtë saj.
Kurti ka folur mbi sfidat e dekadës së fundit të shekullit të kaluar, duke theksuar figura kyçe në zhvillimet politike dhe shoqërore të kohës.
“Fillimi i dekadës së fundit të shekullit të kaluar ishte i rëndë dhe i vështirë, por: Dr. Gazmend Zajmi ishte në krye të hartimit të kushtetutës për mëvetësi me vetëvendosje; Anton Çetta i printe pajtimit të gjaqeve mes shqiptarëve; Adem Demaçi u kthye te populli i tij pas gjithsej 28 vite nëpër burgje; Dr. Ibrahim Rugova e udhëhiqte Alternativën për pavarësi me një rezistencë paqësore; Dr. Ejup Statovci ishte në krye të rimbëkëmbjes së Universitetit të Prishtinës; Ukshin Hoti organizonte demonstrata popullore e shkruante për demokraci autentike; Akademik Rexhep Qosja dominonte debatet historike dhe frymëzonte rininë patriotike; etj. E në fillim të asaj dekade, pasi ishin kthyer nga stërvitjet ushtarake në Shqipëri, Adem Jashari, Zahir Pajaziti dhe Sali Çekaj organizonin grupet e armatosura drejt formimit të UÇK-së.”, tha ai.
Në vazhdim, ai ka shtuar se “Qëndresa shoqërore që i parapriu protestave aktive studentore dhe luftës së lavdishme çlirimtare, kërkonte angazhim intelektual e kontribut qytetar, përkushtim kombëtar e nivel kulturor, vetëdije politike e afirmim ndërkombëtar. Me fjalën e qetë dhe të urtë, me punën e vazhdueshme dhe të durueshme, Presidenti Rugova përfaqësonte politikat e tij në Kosovë dhe jashtë saj, për liri, për demokraci dhe për pavarësi.”
Zbulimin e shtatores së Ibrahim Rugovës në Podujevë, të realizuar nga skulptori Gëzim Muriqi, Kurti e ka cilësuar si një kontribut të rëndësishëm në pasurimin e ikonografisë së shesheve publike, duke e nderuar dhe kujtuar kështu kontributin e Rugovës.