Kryeministri i Kosovës, Albin Kurti, ka pritur sot në takim ekipin e Kosovës në karate, i cili ka fituar medalje të bronztë në Kampionatin Botëror të Karatesë, që u mbajt nga 24-29 tetor në Budapest të Hungarisë.
Me këtë rast, kryeministri Kurti i ka uruar për suksesin e arritur në Kampionatin Botëror, dhe u ka dëshiruar atyre suksese të mëtejme duke i siguruar mbështetje institucionale në mënyrë që të vazhdojnë me rezultate e suksese të tjera.
“Sportistet falënderuan kryeministrin Kurti për pritjen dhe mbështetjen. Gjatë bashkëbisedimit ato ndanë me të përvojat e tyre nga pjesëmarrja në kampionat dhe rrugëtimin e tyre në karrierën profesionale”, ka njoftuar Kryeministria.
Ky sukses vlerësohet historik, pasi është fituar për herë të parë në konkurrencën e femrave dhe në nivel ekipor në karate.
Kosova në këtë kampionat ka regjistruar katër fitore duke mposhtur Anglinë, Zvicrën, Francën dhe Kazakistanin dhe vetëm një humbje nga Japonia, e cila më pas arriti deri në finale.