Kryeministri në detyrë, Albin Kurti ka nisur takimet paraprake me partitë politike të pakicave lidhur me formimin e qeverisë së re pas certifikimit të zgjedhjeve të 9 shkurtit.
Në njoftim thuhet se Kurti ka takuar zëvendëskryeministren e tretë për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi, kjo e fundit e konfirmoi vazhdimin e bashkëpunimit me Lëvizjen Vetëvendosje.
“Kryeministri i Republikës së Kosovës, Albin Kurti, ka filluar takimet me partitë politike të pakicave, për konsultim me to në lidhje me formimin e qeverisë së re pas certifikimit të rezultatit të zgjedhjeve të 9 shkurtit dhe fillimit të afateve kushtetuese drejt formimit të legjislaturës dhe qeverisë së re. Në kuadër të këtyre diskutimeve, kryeministri u takua me zëvendëskryeministren e tretë për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi. Ajo e konfirmoi gatishmërinë e plotë për vazhdim të bashkëpunimit me Lëvizjen VETËVENDOSJE! si fituese e zgjedhjeve të fundit dhe mbështetjes së kryeministrit Kurti në formimin e qeverisë së re. Kryeministri Kurti e falënderoi znj. Rexhepi për bashkëpunimin e frytshëm, rezultatet e arritura gjatë këtij mandati dhe punët e mbara që na presin në katër vjeçarin e ardhshëm”, thuhet në njoftim.
Kujtojmë se presidentja e Kosovës, Vjosa Osmani, dje e ka caktuar 15 prillin si datë të mbajtës së seancës konstituive për legjislaturën e nëntë.