Gjatë vizitës në Massachusetts, kryeministri i Kosovës, Albin Kurti, është pritur në takim nga guvernatori, Charles Baker.
Sipas njoftimit, Kurti ka folur për mundësitë e investimit në Kosovë.
Shefi i ekzekutivit, ka thënë se rinia e talentuar, rritja ekonomike, rritja e eksporteve dhe e të hyrave tatimore, borxhi i ulët publik, me më pak se 30 për qind të Prodhimit të Brendshëm Bruto, trajtimi ndaj investitorëve të huaj dhe Gjykata Komerciale në themelim e sipër, ofrojnë mjedis të favorshëm për investime dhe të të bërit biznes në Kosovë.
Ai, gjithashtu, ka theksuar klimën tërheqëse për investime, veçanërisht në sektorin e teknologjisë së informacionit.
Sipas tij, mbi 650 kompani të këtij sektori, 70 për qind e të cilave eksportojnë shërbime kryesisht në Shtetet e Bashkuara të Amerikës(ShBA) dhe Bashkimin Evropian(BE), tregojnë potencialin e madh dhe të dëshmuar të këtij sektori në Kosovë.
Si arsye të qëndrueshme për investime në Kosovë, kryeministri Kurti ka përmendur edhe pozitën e favorshme gjeografike dhe kulturore, popullatën e re, kreative dhe të talentuar, njohjen e mirë të gjuhës angleze, shtrirjen e gjerë të rrjetit të internetit, politikën stabile fiskale, infrastrukturën moderne të transportit, etj.
Ndryshe, më gjashtë maj, Kurti ka filluar vizitën zyrtare në ShBA, ku është takuar me zyrtarë shtetërorë, udhëheqës të ndërmarrjeve, përfaqësues të organizatave dhe me përfaqësuesit e Korporatës së Sfidave të Mijëvjeçarit(MCC).