Kryeministri i Kosovës, Albin Kurti, sot priti në takim drejtorin e CIA-s, William Burns, takim për të cilin u tha nga qeveria se përfaqëson një moment të rëndësishëm historik në marrëdhëniet bilaterale Kosovë – ShBA.
“Kryeministri i Republikës së Kosovës, Albin Kurti, sot priti në takim drejtorin e CIA-s, William Burns. Kjo vizitë përfaqëson një moment të rëndësishëm historik në marrëdhëniet bilaterale Kosovë – ShBA, ku u theksua përkushtimi i Qeverisë dhe institucioneve të sigurisë dhe inteligjencës së Kosovës, me në krye AKI-në, për të avancuar bashkëpunimin me CIA-n”, thuhet në njoftimin e qeverisë.
Në komunikatën e qeverisë thuhet se kjo vizitë është dëshmi e marrëdhënieve të forta dhe të qëndrueshme midis dy shteteve dhe është një mundësi e artë për të thelluar bashkëpunimin strategjik, për paqen dhe sigurinë në rajon dhe më gjerë.
“Vizita historike e drejtorit të CIA-s, z. William Burns, në Kosovë, vlerësohet lartë nga Qeveria e Republikës së Kosovës. Ajo është dëshmi e marrëdhënieve të forta dhe të qëndrueshme midis dy shteteve dhe është një mundësi e artë për të thelluar bashkëpunimin strategjik, për paqen dhe sigurinë në rajon dhe më gjerë”.
Në takim, Kurti e ka falënderuar drejtorin e CIA-s për mbështetjen e vazhdueshme dhe shprehu përkushtimin për thellimin e bashkëpunimit në fushat me interes të përbashkët, duke e njoftuar atë që “vlerat amerikane, që ndërlidhen me demokracinë, sundimin e rendit dhe ligjit dhe orientimet e palëkundura Euroatlantike, do të mbeten shtyllat qendrore të qeverisjes së mirë e demokratike në Kosovë”.
Kryeministri Kurti thuhet se e njoftoi drejtorin Burns me “rritjen dhe zhvillimin ekonomik si dhe progresin shoqëror e demokratik të Kosovës”.
“Kryeministri Kurti e njoftoi drejtorin Burns me rritjen dhe zhvillimin ekonomik si dhe progresin shoqëror e demokratik të Kosovës, duke theksuar që të gjitha sfidat e brendshme të sigurisë po menaxhohen suksesshëm me forcën e ligjit të drejtë të shtetit tonë demokratik. Në këto tri vitet e fundit, ai shtoi që Bruto Produkti Vendor i Kosovës është rritur për 33% kurse buxheti shtetëror për 35%, me ç’rast 11.1% (apo 1/9) e buxhetit vjetor i dedikohet Ministrisë së Punëve të Brendshme dhe Ministrisë së Mbrojtjes”.
Më herët, edhe presidentja e Kosovës, Vjosa Osmani, u deklarua për takimin me shefin e CIA-s.
E para e vendit ka thënë se aleanca me Shtetet e Bashkuara të Amerikës (ShBA) është garancë për siguri, paqe e sukses, teksa ka shpërndarë disa fotografi nga takimi.
Vizita e shefit të CIA-s në Kosovë pason vizitat që zyrtari kryesor i inteligjencës amerikane zhvilloi në Bosnje e Hercegovinë dhe Serbi.