Kryeministri i Kosovës, Albin Kurti, ka pritur në takim ambasadorin e ri të Shqipërisë në Kosovë, Petrit Malaj.
Në këtë takim, ata diskutuan për rajonin e Ballkanit Perëndimor, ku theksuan se bashkëpunimi midis shteteve duhet të jetë i bazuar në demokraci e siguri, në orientimin dhe vlerat e NATO-s dhe të BE-së.
“Kryeministri Kurti e përgëzoi ambasadorin për detyrën e re. Ai vlerësoi marrëdhëniet vëllazërore mes dy shteteve tona, duke theksuar rëndësinë e thellimit dhe avancimit të bashkëpunimit tonë. Biseduan për rajonin e Ballkanit Perëndimor, ku bashkëpunimi midis shteteve duhet të jetë i bazuar në demokraci e siguri, në orientimin dhe vlerat e NATO-s dhe BE-së”, thuhet në njoftimin e ZKM-së.
Tutje, thuhet se Kurti veçoi marrëveshjet në mes të Kosovës dhe Shqipërisë, zbatimi i të cilave, siç thotë ai, forcon marrëdhëniet dhe i sjell qytetarët më pranë njëri-tjetrit
Kurti ka theksuar se ato kanë ndikim të drejtpërdrejtë e pozitiv në jetën e tyre, të bizneseve e më gjerë.
“Marrëdhëniet dypalëshe ndërmjet Republikës së Kosovës dhe asaj të Shqipërisë, kanë sjellë nënshkrimin e gjithsejtë 184 marrëveshjeve, protokolleve e memorandumeve”.
Ndërkaq, ambasadori Malaj shprehu përkushtimin e tij për të çuar më tej marrëdhëniet e shkëlqyera, duke theksuar që ndihet i nderuar dhe i lumtur që do të shërbejë në Kosovë.
Duke i uruar suksese në këtë angazhim të ri, Kurti e falënderoi ambasadorin Malaj për takimin e bisedën e frytshme.