Kryeministri i Kosovës, Albin Kurti, ka pritur sot në takim Kryetaren e Kuvendit të Shqipërisë, Elisa Spiropalin.
Spiropali po zhvillon vizitën e parë zyrtare në Kosovë që nga marrja e detyrës së re së fundmi.
Kurti ka shkruar se në këtë takim është diskutuar për bashkëpunimin mes dy vendeve e duke theksuar edhe atë ndërmjet kuvendit të Kosovës dhe Shqipërisë.
“Mbështetja e Shqipërisë është përherë e nevojshme dhe e rëndësishme për Republikën e Kosovës, e sidomos kur kjo ndërlidhet me proceset e anëtarësimit të Kosovës në organizata ndërkombëtare, ku Shqipëria është një zë i fuqishëm krah interesave të vendit tonë,” ka shkruar Kurti.
Teksa ka shtuar se produktiv dhe me rezultate të mira është bashkëpunimi ndërmjet dy vendeve.
“Trashëgimia e bashkëpunimit tonë është produktive dhe me rezultate pozitive, përkrahja e ndërsjellë dhe zhvillimi i përbashkët, për më shumë prosperitet dhe në të mirë të qytetarëve tanë.”