Kryeministri i Republikës së Kosovës, Albin Kurti, është takuar me shefin e ri të Misionit të Bashkimit Evropian për Sundim të Ligjit, EULEX, Giovanni Pietro Barbano.
Ky takim i Kurtit dhe Barbano-s vjen me rastin e fillimit të mandatit të këtij të fundit.
Gjersa u diskutua për bashkëpunimin e mëtutjeshëm në mes të Qeverisë së Republikës së Kosovës dhe EULEX-it, Kurti u urua nga shefi i ri i EULEX-it për progresin që Republika e Kosovës ka shënuar në fushën ekonomike dhe atë demokratike.
“Duke e falënderuar për mikpritjen, z. Barbano e përgëzoi Kryeministrin Kurti për progresin mbresëlënës ekonomik dhe demokratik që ka shënuar Kosova. U bisedua për bashkëpunimin ndërmjet Qeverisë së Republikës së Kosovës dhe institucioneve të rendit dhe sigurisë me misionin EULEX me qëllim të forcimit të sundimin të ligjit, si dhe për zhvillimet në vend. Kryeministri Kurti theksoi përkushtimin e Qeverisë për shtet ligjor, demokraci dhe mbrojtje të lirive dhe të drejtave të njeriut të të gjithë qytetarëve që jetojnë në Republikën e Kosovës. Kryeministri Kurti theksoi përkushtimin e Qeverisë për shtet ligjor, demokraci dhe mbrojtje të lirive dhe të drejtave të njeriut të të gjithë qytetarëve që jetojnë në Republikën e Kosovës.”, thuhet në njoftim.
Në takim i pranishëm qe ministri i Punëve të Brendshme, Xhelal Sveçla, drejtori i përgjithshëm i Policisë së Kosovës, Gazmend Hoxha, dhe koloneli i Forcës së Sigurisë së Kosovës, Ejup Maqedonci.